=======
នាព្រឹកថ្ងៃសុក្រ ២កើត ខែចេត្រ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២០ ខែមីនា ឆ្នាំ២០២៦ ក្រុមសមាជិកព្រឹទ្ធសភាប្រចាំភូមិភាគទី៧ ដឹកនាំដោយឯកឧត្តមបណ្ឌិត ម៉ុង ឫទ្ធី ប្រធានក្រុម និងជាប្រធានគណៈកម្មការទី៣ព្រឹទ្ធសភា បានអញ្ជើញចុះជួបសំណេះសំណាលជាមួយក្រុមប្រឹក្សាឃុំ សង្កាត់ និងនាយប៉ុស្តិ៍នគរបាលរដ្ឋបាលឃុំ សង្កាត់ ក្នុងខេត្តកំពង់ស្ពឺ ក្នុងគោលបំណងផ្សារភ្ជាប់ និងរួមប្រាស្រ័យទំនាក់ទំនងឱ្យកាន់តែជិតស្និទ្ធជាមួយសមាជិកក្រុមប្រឹក្សាឃុំ សង្កាត់ ក្នុងការពង្រឹងការអនុវត្ត តួនាទី ភារកិច្ចរបស់ក្រុមប្រឹក្សាឃុំ សង្កាត់ ការអភិវឌ្ឍមូលដ្ឋាន ការអនុវត្តគោលនយោបាយភូមិ ឃុំ សង្កាត់មានសុវត្ថិភាព និងការផ្តល់សេវាសាធារណៈ ដើម្បីចូលរួមដោះស្រាយ ឬនាំយកយោបល់ បញ្ហាប្រឈម និងសំណូមពររបស់ក្រុមប្រឹក្សាឃុំ សង្កាត់ ជូនគណៈកម្មាធិការអចិន្រ្តៃយ៍ព្រឹទ្ធសភា និងព្រឹទ្ធសភា នៅសាលប្រជុំសាលាខេត្តកំពង់ស្ពឺ សមាសភាពចូលរួមចំនួន ៣៤០នាក់។
ក្នុងពិធីសំណេះសំណាលនេះ ទទួលបានធាតុចូលក្នុងការផ្លាស់ប្តូរចំណេះដឹង ចំណេះធ្វើ បទពិសោធន៍ល្អៗ និងកិច្ចសហការគាំទ្រពីគ្នាទៅវិញទៅមក បង្កភាពងាយស្រួល ដល់សមាជិក សមាជិកាក្រុមប្រឹក្សាឃុំ សង្កាត់ បង្កើនសមត្ថភាព ចែករំលែកការអនុវត្តដែលជាបទពិសោធន៍ដ៏ប្រសើរកន្លងមក ក្នុងការផ្តល់សេវាឱ្យកាន់តែមានប្រសិទ្ធភាព និងអភិវឌ្ឍន៍មូលដ្ឋាន ដោយធានាបាននូវសុខសុវត្ថិភាពជូនប្រជាពលរដ្ឋ និងសូមកោតសរសើរចំពោះការខិតខំប្រឹងប្រែងរបស់ថ្នាក់ដឹកនាំខេត្ត ក្រុង ស្រុក ឃុំ សង្កាត់ ក្នុងការបំពេញភារកិច្ច ដែលសម្រេចបាននូវសមិទ្ធផលគួរជាទីមោទនៈក្នុងការបម្រើប្រជាពលរដ្ឋក្នុងមូលដ្ឋាន។
នាឱកាសនោះ ក្រុមសមាជិកព្រឹទ្ធសភាប្រចាំភូមិភាគទី៧ បានជូនក្រូចលឿង ដល់សមាជិកទាំងអស់ដែលបានអញ្ជើញចូលរួមក្នុងពិធី សរុបចំនួន ៣៤០កេស ព្រមទាំងជូនថវិកាដល់ក្រុមប្រឹក្សាឃុំ-សង្កាត់ និងនាយប៉ុស្តិ៍នគរបាលរដ្ឋបាលឃុំ សង្កាត់ចំនួន ២៦៤នាក់ សរុបចំនួន ១៣,២០០,០០០រៀល។
ប្រភព៖ នាយកដ្ឋានព័ត៌មាន
